انا مخطوبه بقالي سنتين ونص وباحب خطيبي جدا وخلاص بنجهز الشقه عشان نتجوز وهو بيشتغل
في محافظه تانيه وباشوفه كل شهر.. مش عارفه ده ميزه ولا عيب وانا وهو فينا
طباع كتير اوي زي بعض كتير باحس اننا واحد.
بس دلوقتي بقيت مخنوقه وهو كمان؛ انا وهو عاقلين زياده عن اللزوم.. دلوقتي لما بييجي
لي بيكون زهقان من الشغل ومالهوش نفس يتكلم فيه؛ فبنكون واحشين بعض؛ بس مش عارفه
مش بنلاقي كلام نقوله باحس بملل وكابه بعد شويه ؛ بس ماباكونش عارفه اعمل ايه؛
خاصه ان انا وهو قليلي الكلام وانا بيبقى نفسي اشغله واطلعه من اللي هو فيه؛
زي البنات اللي بتكون مجننه خطيبها؛ بس مش باعرف.. يا ريت تساعدوني وتفهموا احساسي.
love
صديقتي الجميله كل شيء له عيوب ومزايا والكمال لله سبحانه وتعالى وبرغم كل التشابهات بينك
وبين خطيبك؛ فانت لسه هتقابلي الكتير من الاختلافات؛ خاصه بعد الجواز؛ بس ده مش معناه
برضه انك تنزعجي؛ لكن حاولي دائما انك تراقبي وتفكري وتحاولي تتاقلمي وتتصرفي بنفس الرزانه اللي
بتوصفي نفسك بيها في المستقبل.
مهم انك تعرفي خطيبك بيحب ايه ومابيحبش ايه؟ وايه اللي بيفرحه وايه اللي بيغضبه؟ ولما
بيكون زعلان بيحب يتكلم ويشكي ولا بيحب يبعد ويسكت لغايه ما يهدى؟ ومن مراقبتك لطباعه
تقدري تفكري ازاي تسعديه وتكوني سعيده معاه وبعدها تبدئي بالتنفيذ؛ لان الناس مختلفه وممكن اللي
يسعد خطيبك مايكونش بيسعد رجاله تانيه والعكس صحيح.
وبانصحك تقري كام كتاب عن العلاقات او عن: كيف يفكر الرجال.. ولو مالكيش روح للكتب
تقدري تدوري على مقالات على الانترنت في نفس الموضوع؛ عشان القراءه هتساعدك كتير وهتفهمك حاجات
كتير عن عالم خطيبك.
اما لو كنت عاوزه زي ما قلت طرق لكسر الملل؛ فدي ليها حلول كثيره وبسيطه
: اطبخي له لما ييجي لك البيت او ابعتي له رسايل قصيره من وقت للتاني
بكلمه حلوه وماتستنيش الرد او اشتري له هدايا بسيطه من وقت للتاني اعزميه على العشاء
او اعملي له اسطوانه مزيكا من اللي بيحب يسمعها لما يكون مزاجه رايق او هاتي
له كتب دينيه لو متدين لو مابيحبش المزيكا..
كل انسان له مدخل وله حاجات بيحبها اعرفي هي ايه واعمليها وغيري وطوري فيها وخليك
متجدده .. اطلبي منه حاجات ولو بسيطه حسسيه بالمسئوليه ناحيتك وحسسيه بثقتك فيه وثقتك في
نفسك وانك قادره تسعديه.
واذا كان على الكلام؛ فحاولي تتعلمي تفتحي مواضيع معاه؛ اتكلمي عن فيلم جديد في السينما
او حاجه قريتيها على الانترنت شاركيه في الحكايات اللي بتسمعيها او بتقريها اساليه عن شغله
او عن اصحابه عن هواياته او اكتر الاماكن اللي بيحبها اطلبي منه يساعدك في اللي
بتعمليه؛ سواء مذاكره او شغل او بحث على الانترنت اشركيه في اهتماماتك.
لما يكون زعلان؛ ماتقعديش ساكته وفي الوقت نفسه ماتساليش “انت زعلان؟”؛ ما دام هي واضحه
زي الشمس.. اطلبي منه يحكي لك اللي مزعله وحسسيه انك مهتمه تعرفي فعلا لو رفض
جربي تشغلي شيء كوميدي يكون بيحبه او مزيكا هاديه وتعملي له ليمون وتتكلمي معاه عن
اخبارك او مواقف مضحكه اخواتك عملوها معاك.
الحاجات دي مش هتعمليها كلها مره واحده ؛ لكن من وقت للتاني مع محاولات حقيقيه
انك تشيلي الحواجز اللي بينكم وتعبري له عن مشاعرك؛ لكن في حدود الخطوبه طبعا وان
شاء الله كله هيبقى تمام.
- احلي كلام عن خطيبي
- خطيبي كلام رومنسي
- صورعليها كلام روعه علي البنت المخطوبه
- كلام المخطبين
- مواضيع لكسر الملل بين المخطوبين
