شدوا ليك ركب فوق مهرك الجماح
ضرغام الرجال الفارس الجحجاح
تمساح الدميره الما بيكتلو سلاح
السم النقوع الفي البدن نتاح
يا عصار المفازه اللعيون كتاح
المال مابيهمك ان كتر وان راح
بطنا جابتك والله ما بتندم
يا اسد الكداد الفي خلاك رزم
يا رعد الخريف الفي سماك دمدم
بابك ما انقفل نارك تجيب اللم
مابتعزم تقول غيراستريح حرم
ابواتك جبير بيحلو للعوجات
مطمورتك تكيل للخاله والعمات
في الجود والكرم ايديك دوام بارزات
يا اب قلبا حديد في الحوبه ما بتنفات
عينيك يا الصقر في الحاره ما بتنوم
صدرك للصعاب دايما بعرف العوم
في وسط الفريق للفارغه ما بتحوم
لا بتنلام ولا بتعرف تجيب اللوم
ود ناسا عزاز جمعوا المكارم كوم
تفخر بيك بنات الباديه والخرطوم
