ماجد..
روحي بلقاك اتفز فزه حمامه
وتحوم حولك من غلاك واملها
يا لين من نظره غلا وابتسامه
اترد روحي الغاليه في محلها
منصور..
لك في فضى صدري فؤادن غرامه
يحمل محبه انسى تلقى مثلها
يعني اذا قلت احصى شوقه وهيامه
تقدر تقول بكثر هالدنيا كلها
اهواك وارسم للتعجب علامه
كلما بنورك عيني خطت كحلها
واسال هواك اللي عظيم مقامه
هل خلا فيني ذره ما وصله
ماجد…
رح للقصيد ودور اعذب كلامه
ون جبت كلمه توصف احساسي قلها
دامي عجزت القالي وصف ومدامه
حبك يسد بلاد ويكفي اهلها
اشكر هواك اللي غمرني اهتمامه
واشكرها روحك يللي من طيب اصلها
سوت على عمري وعمرك غمامه
تمطر احاسيسي وينبت غزلها
منصور…
مثلك على راسي اشيل احترامه
واعطيه من ايام عمري عسلها
لني مدام انته في خير وسلامه
ما ريد اي حاجه من الدنيا كلها.
