كلمات سيره الحب
غناء/ السيده ام كلثوم
كلمات/ الشاعر مرسى جميل عزيز
الحان/ الموسيقار بليغ حمدى
مقام/ السيكاه – عام 1964م
طول عمرى باخاف من الحب وسيره الحب وظلم الحب لكل اصحابه
واعرف حكايات مليانه اهات ودموع وانين والعاشقين دابوا ما تابوا
طول عمري باقول لا انا قد الشوق وليالي الشوق ولا قلبي قد عذابه
وقابلتك انت لقيتك بتغير كل حياتي
ما اعرفش ازاي حبيتك ما اعرفش ازاي يا حياتى
من همسه حب لقيتنى باحب وادوب في الحب وصبح وليل على بابه
****
فات من عمري سنين وسنين شفت كتير وقليل عاشقين
اللي بيشكى حاله لحاله واللي بيبكى على مواله
اهل الحب صحيح مساكين
ياما الحب نده على قلبي ما ردش قلبي جواب
ياما الشوق حاول يحايلني واقول له روح يا عذاب
ياما عيون شاغلوني لكن ولا شغلوني
الا عيونك انت دول بس اللي خدوني وبحبك امروني
امروني احب لقيتني باحب وادوب في الحب وصبح وليل على بابه
****
ياللى ظلمتوا الحب وقلتوا وعدتوا عليه قلتوا عليه مش عارف ايه
العيب فيكم يا في حبايبكم اما الحب ياروحي عليه
فى الدنيا ما فيش ابدا ابدا احلى من الحب
نتعب نغلب نشتكى منه لكن بنحب
يا سلام ع القلب وتنهيده في وصال وفراق
وشموع الشوق لما يقيدوا ليل المشتاق
يا سلام ع الدنيا وحلاوتها في عين العشاق
انا خدنى الحب لقيتنى باحب وادوب في الحب وصبح وليل على بابه
****
يا اللي مليت بالحب حياتي اهدى حياتي اليك
روحي .. قلبي .. عقلي .. حبي كلي ملك ايديك
صوتك .. نظراتك .. همساتك شيء مش معقول
شيء خلى الدنيا زهور على طول وشموع على طول
الله يا حبيبى على حبك وهنايا معاك الله يا حبيبى يا حبيبى الله الله
ولا دمعه عين جرحت قلبي ولا قوله اه
ما بقولش في حبك غير الله الله يا حبيبى على حبك الله الله
من كتر الحب لقيتني باحب وادوب في الحب وصبح وليل على بابه
