كلمات عن الملك عبد الله

………………………………………….. …..

لوله طلبه اللي يعلم النيات=كل هامه تعرف القبر تنزله
ياقصيدي ترا بعض القصيد اسكات=والله اني ماعودتك على الذله.
ذاخرك لين تبدي حزه الوقفات=كنك الهيل وظلوعي لك الدله
ياوطن عاد عيدك وبرك الحزات=مايزين القصيد الا على حله
ياسلامي على وجه السعد بذات=من يمينه تعقد الحبل وتحله
راعي الوجه الابيض جابر العثرات=الوطن تحت ظل الله ثم ظله
ابلج كنه البراق في الظلمات=واضح مثل ماتوضح لنا المله
شامخ في المواقف يكسب الطالات=صيرمي يقص الراس ويتله
كان مصر الشقيقه تعشق السادات=حن وهم والعرب في ظل عبدالله
مرحبا مرحبا ياقايد القادات=ياهلا ياهلا بك ياهلا والله
بنيابه عن اللي يكسب الشارات=شيخ شمل اقحطان وجابر الخله
بن دليم المقدم باول الهيات=في الحماد وجبال الريث والجله
له عهود قديمه من زمان فات=من جدوده وعهدك صار عهد له
وبسم فارس ***طان هل الهقوات=مرحبا مرحبا والطيب لك كله
وب ولي العهد يامرحبا ميات=مرحبا يابو خالد وانت عضد له
طير حر جناحك يعشق الطلعات=مجلس الطيب والناموس تحتله
ياملكنا لعينك ترخص الهامات=مانساوم على حبك ولا بله
يابوا متعب لوقفات القدم حزات=قلب ماله ولاء لك جعله العله
سيدي حن عيالك والشعوب اشتات=والوطن مايهان وحن عيال له
حن جنودك بلا رتبه بلا بدلات=راعي الذود يسبق راعي الفله.
كلنا من البحر لين البحر قوات=شعبنا من تحت رايه زعيم له
ندحم الضد بمتون لها صملات=من زمان القناء والسيف والسله
نعشق الموت عشق الطفل للعبرات=ولا عشق الفتى للي تكحل له
والخوارج مانقبل منهم الزلات=قل لراعي الردى يااعلامنا قله.
قله انا هل التاريخ والفزعات=لايحسب سيوف الحق صيد له
والله ان ماينقصنا ليا من مات=وان رجع في طريق الحق فاحسن له
كل حصني خبيث يدور الحيلات=نضربه وجه لا لا مانتحيل له
لانشكك ولا تدخل بنا الشكات=ناصله من هنا منيه ناصله
وان وصلناه ماجينا على الغرات=ننذره وان رفض لا مانتحصن له
ناخذ الثار منه حزه الوقفات=يدفن ال*** مانرضى له الزله
مرحبا يابو متعب وبرك الحزات= باسم شيخ اقحطان وجمعنا كله