كلمات صلاح جاهين عن الحب
*انا شاب لكن عمرى الف عام
وحيد لكن بين ضلوعى زحام
خايف لكن خوفى منى انا
اخرس لكن قلبى مليان كلام
عجبى!!!
*يا باب يا مقفول … امتي الدخول
صبرت ياما و اللي يصبر ينول
دقيت سنين … و الرد يرجع لي : مين ؟
لو كنت عارف مين انا كنت اقول
عجبي !!!
*احب اعيش ولو في الغابات
اصحي كما ولدتني امي و ابات
طائر .. حوان.. حشره .. بشر ..بس اعيش
محلا الحياه .. حتي في هيئه نبات
عجبي !!
*سهيرت ليالي و ياما لفيت و طفت
و ف ليه راجع في الضلام قمت شفت
الخوف … كانه كلب سد الطريق
و كنت عاوز اقتله .. بس خفت
عجبي !!
*كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع انه فات بدل التاريخ تاريخين
عجبي !!
*ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
اعدي بحر الاقي غيره اتحفر
عجبي !!!
*نوح راح لحاله و الطوفان استمر
مركبنا تايهه لسه مش لاقيه بر
اه م الطوفان واهين يا بر الامان
ازاي تبان و الدنيا غرقانه شر
عجبي !!
*علي رجلي دم .. نظرت له ما احتملت
علي ايدي دم.. سالت ليه ؟ لم وصلت
علي كتفي دم.. و حتي علي راسي دم
انا كلي دم .. قتلت ؟ ….. والا اتقتلت
عجبي !!
*ينبوع و في الحواديت انا سمعت عنه
انه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!
*يا قرص شمس ما لهش قبه سما
يا ورد من غير ارض شب و نما
يا اي معني جميل سمعنا عليه
الخلق ليه عايشين حياه مؤلمه
عجبي !!!
*شاف الطبيب جرحي وصف له الامل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني …. و ايه العمل
عجبي !!!
***اعرف عيون هي الجمال و الحسن
و اعرف عيون تاخد القلوب بالحضن
و عيون مخيفه و قاسيه وعيون كتير
وباحس فيهم كلهم بالحزن
عجبي !!
*ايش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينه كده
عجبي !!
*يا حزين يا قمقم تحت بحر الضياع
حزين انا زيك و ايه مستطاع
الحزن ما بقالهوش جلال يا جدع
الحزن زي البرد … زي الصداع
عجبي !!!!
*في يوم صحيت شاعر براحه و صفا
الهم زال و الحزن راح و اختفي
خدني العجب و سالت روحي سؤال
انا مت ؟ و لا وصلت للفلسفه
عجبي !!!
*علي بعد مليون ميل من ارضنا
من الفراغ الكوني بصيت انا
لا شفت فرق بين جبال و بحور
و لا شفت فرق ما بين عذاب او هنا
عجبي !!
*انسان ايا انسان ما اجهلك
ما اتفهك في الكون و ما اضالك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
*نظرت فوق للنجوم و انا ساير
رجليا عترت في الحفر و الحجاير
بقيت اقول و انا ع التراب: يا سلام
مش بس عبره اخذت لكن عباير
عجبي !!!
*- يا نجم .. نورك ليه كده بيرتجف ؟
هو انت قنديل زيت ؟ او تختلف
– انا نجم عالي .. بس عالي قوي
و كل ما انظر تحت اخاف انحدف
عجبي !!!!
*السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!
*وقفت بين شطين علي قنطره
الكدب فين و الصدق فين يا تري
محتار ح اموت .. الحوت خرج لي وقالي
هو الكلام يتقاس بالمسطره
عجبي !!!
*نسمه ربيع لكن بتكوي الوشوش
طيور جميله بس من غير عشوش
قلوب بتخفق انما وحدها
هي الحياه كده .. كلها في الفاشوش
عجبي !!!!
*يا طير يا عالي في السما طظ فيك
ما تفتكرشي ربنا مصطفيك
برضك بتاكل دود و للطين تعود
تمص فيه يا حلو .. و يمص فيك
عجبي !!!
*كروان جريح مضروب شعاع م القمر
سقط من السموات فؤاده انكسر
جريت عليه قطه علشان تبلعه
اتاريه خيال شعراء و مالهوش اثر
عجبي !!!
*اخطفني ياللي تحبني ع الحصان
الدنيا قالت يوم في ماضي الزمان
اخطفني ياللي تحبني ع الفرس
الدنيا قالت .. قام خطفها الشيطان
عجبي !!!!
*جالك اوان ووقفت موقف وجود
يا تجود بده يا قلبي يا بده تجود
ما حد يقدر يبقي علي كل شئ
مع ان عجبي كل شئ موجود
عجبي !!!
*انا كنت شئ و صبحت شئ ثم شئ
شوف ربنا .. قادرعلي كل شئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!
*يا مشرط الجراح امانه عليك
و انت ف حشايا تبص من حواليك
فيه نقطه سوده في قلبي بدات تبان
شيلها كمان .. و الفضل يرجع اليك
عجبي !!!
*كيف شفت قلبي و النبي يا طبيب
همد و مات و الا سامع له دبيب
قاللي لقيته مختنق بالدموع
و ما لوش دوا غير لمسه من ايد حبيب
عجبي !!!!
*تسلم يا غصن الخوخ يا عود الحطب
بييجي الربيع .. تطلع زهورك عجب
و انا ليه بيمضي ربيع وييجي ربيع
و لسه برضك قلبي حته خشب
عجبي !!!
*.. دي مزكرات و كتبتها من سنين
في نوته زرقا لون بحور الحنين
عترت فيها .. رميتها في المهملات
وقلت صحيح اما صحيح كلام مخبولين
عجبي !!
*دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات اكتر بترفض تموت
عجبي !!
-* الدنيا من غير الربيع ميته
ورقه شجر ضعفانه و مفتته
– لا يا جدع غلطان تامل وشوف
زهر الشتا طالع في عز الشتا
عجبي !!!
*ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كبار
و ما لكش غير منقار و قادر تعيش
عجبي !!!!
*سمعت نقطه ميه جوه المحيط
بتقول لنقطه ما تنزليش في الغويط
اخاف عليكي م الغرق .. قلت انا
ده اللي يخاف م الوعد يبقي عبيط
عجبي !!!
*بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!
*كرباج سعاده وقلبي منه انجلد
رمح كانه حصان و لف البلد
و رجع لي نصل الليل و سالني .. ليه
خجلان تقول انك سعيد يا ولد
عجبي !!!
*مزيكه هاديه الكون فيها انغمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي!!
*انشد يا قلبي غنوتك للجمال
و ارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبي !!
*اه لو انا و محبوب جزنا الفضا
في سفينه وحدينا .. واشيا رضا
ساعه صفا تعجبنا نرجع لها
و الهم قبل ما ييجي .. يبقي مضى
عجبي !!
*ياللي عرفت الحب يوم و انطوي
حسك تقال مشتاق لنبع الهوي
حسك تقول مشتاق لنبع الغرام
ده الحب .. مين داق منه قطره…ارتوي
عجبي !!!
*زحام و ابواق سيارات مزعجه
للي يطول له رصيف.. يبقي نجا
لو كنت جنبي يا حبيبي انا
مش كنت اشوف ان الحياه مبهجه
عجبي!!
*يا ميت ندامه ع القلوب الخلا
لا محبه فيها و لا كراهه ولا
حتي يا قلبي الحزن ما عادش فيك
معلهش .. لك يوم برضه راح تتملا
عجبي !!
*فتحت شباكي لشمس الصباح
ما دخلش منه غير عويل الرياح
و فتحت قلبي عشان ابوح بالالم
ما خرجش منه غير محبه و سماح
عجبي !!!!
*غمست سنك في السواد يا قلم
عشان ما تكتب شعر يقطر الم
مالك جرالك ايه يا مجنون … و ليه
رسمت ورده وبيت و قلب و علم
عجبي !!!
*لو فيه سلام في الارض وطمان و امن
لو كان مفيش و لا فقر و لا خوف جبن
لو يملك الانسان مصير كل شئ
انا كنت اجيب للدنيا ميت الف ابن
عجبي !!
*حاسب من الاحزان و حاسب لها
حاسب علي رقابيك من حبلها
راح تنتهي و لابد راح تنتهي
مش انتهت احزان من قبلها؟
عجبي !!!
**ياسك و صبرك بين ايديك و انت حر
تياس ما تياس الحياه راح تمر
انا دقت مندا ومندا عجبي لقيت
الصبر مر و برضك الياس مر
عجبي !!
**ولدي نصحتك لما صوتي اتنبح
ما تخفش من جني و لا من شبح
و ان هب فيك عفريت قتيل اساله
ما دافعش ليه عن نفسه يوم ما اندبح
عجبي !!
*انا قلت كلمه و كان لها معنيين
كما بطن واحده و توامين زي وشين
لو دنيا شر.. التوام الخير يموت
لو دنيا خير .. الشر ح يعيش منين
عجبي !!
*انا اللي بالامر المحال اغتوي
شفت القمر نطيت لفوق في الهوا
طلته ما طلتوش ايه انا يهمني
و ليه .. ما دام بالنشوه قلبي ارتوي
عجبي !!
*عيني رات مولود علي كتف امه
يصرخ تهنن فيه يصرخ تضمه
يصرخ تقول يا بني ما تنطق كلام
ده اللي ما يتكلمش يكتر همه
عجبي !!!!
*ياللي بتبحث عن اله تعبده
بحث الغريق عن اي شئ ينجده
الله جميل و عليم و رحمن رحيم
اجمل صفاته .. وانت راح توجده
عجبي !!!
*لا تجبر الانسان و لا تخيره
يكفيه ما فيه من عقل بيحيره
اللي النهارده بيطلبه و يشتهيه
هو اللي بكره ح يشتهي يغيره
عجبي !!
*و لو اتضنيت و فنيت وعمري انفرط
مش عاوز الجا للحلول الوسط
و كمان شطط و جنون مانيش عاوز
يا مين يقول لي الصح فين والغلط
عجبي !!
*عاد الربيع كانه طعم الحب
و الحب نار جوه العروق بتصب
اتمتع ازاي بيه وانا متقطع
من كتر خوفي لا في الخطيئه يطب ؟
عجبي !!
*في الهو ماشي يا بهلوان اش اش
يا فراشه منقوشه علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!
*وقفت ساعه الصبح باغسل سناني
قالت لي شايف قوتي و لمعاني ؟
ايش تطلب اليوم مني ضحكه اسد ؟
والا ابتسامه اعلانات امريكاني ؟
عجبي !!
*ما انتاش بتلعب ليه يا روح بابا ؟
و لا عسكري و لا لص في عصابه ؟
العب اسد او ديب رهيب او غزال
دي الدنيا في نهايه المطاف غابه
عجبي !!!
*ايه اللي خدته من مرور السنين
يا قلبي الا دمعتك و الانيين
بتئن و ترجع و بتفرح و ترجع تحن
مع ان مش كل البشر فرحانين
عجبي !!!!
*لولا اختلاف الراي يا محترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!
*يا ورده قلبي معاكي في الريح لعب
لا تعبتي م الريح و لا قلبي تعب
احنا كده : نرتاح في صخب الجنون
و في السكون بنخاف قوي و نترعب
عجبي !!!
*بلياتشو قال ايه بس فايده فنوني ؟
و تلات وقق مساحيق بيلونوني
و الطبل و المزامير و كتر الجعير
اذا كان جنون زبوني زاد عن جنوني
عجبي !!!
*الضحك قال يا سم ع التكشير
امشير و طوبه وانا ربيعي بشير
مطرح ما باظهر بانتصر ع العدم
انشالله اكون رسمايه بالطباشير
عجبي !!!!
*قالوا السياسه مهلكه بشكل عام
و بحورها يا بني خشنه مش ريش نعام
غوص فيها تلقي الغرقانين كلهم
شايلين غنايم .. و الخفيف اللي عام
عجبي !!!
*يومي علي الله تنتهي و تغيب
الشمس و تعود تاني يوم لهاليب
زي الحياه ماساه و من كترها
بقي لا انتهاءها و ابتداءها عجيب
عجبي !!
*علم اللوع اضخم كتاب في الارض
بس اللي يغلط فيه يجيبه الارض
اما الصراحه فامرها ساهل
لكن لا تجلب المال و لا تصون العرض
عجبي !!!
*انا كان لي اب . و كان رئيس محكمه
ستين سنه .. في قضيه واحده اترمي
ستين سنه و طلع براءه و خرج
يشكي الحياه و الموت لرب السما
عجبي !!!!
* قالوا ابن ادم روح و بدنه كفن
قالوا لا بدن . قالوا لا ده روح في بدن
رفرف فؤادي مع الرايات في الهوا
انا قلت لا روح في بدن في وطن
عجبي !!!!
