كلمات اغاني جعفر السقيد

 
عليكم الله يا احباب اتلموا وابقوا قراب
خلونا النعيش ايامنا الموت يا داخلنا الباب
الدنيا العبوس غداره زى رايه الفكى الكضاب
تضحك لك تقول جيدلى تتكئ تغرس النشاب
الموت يا صحاب بالجمله اصبح ما بدورلو اسباب
والعاقل يعيش اياموا ما دام من تراب لتراب
هسى ان ماتو مننا عشره تلقاهم تمنيه شباب
والتاسع يكون وسطانى والعاشر يكون يا داب
اخدوا الحمكه من تربالنا اتوكل رمى التيراب
وعارف ربو من ينساهو والصابر دعاهو مجاب
علمنى الزمن يا خلا درسا ما قريتلو كتاب انو الدنيا مهما تبقي كلها في سؤال
وجواب
اللقى يارفاق من الله زيو كذلك الانجاب والحظ ما بتجيبوا القوه والشقى ما بزيلو عذاب

والبكا ما بجيب الرايحه لو جرت الدموع صباب والافراح تدور يمشولا والاحزان تجيك في الباب

الدايره السعاده يكوسها وبينا وبين حزنا حجاب اولا في رنين الضحكه قمتا في لقى الاحباب

يا اخوانا التفاؤل نعمه ديمه يريح الاعصاب
والزول اليكون متشائم العصفور يشوفو غراب
زولا في وضوحو بلا الشمس ود حمداحمد يا رفاق
من شب قام درفون صغير سوالو جوه الناس عرش
يا هو الركيزه الفى الفريق زول حوبه شقيش ما يمش
تلقاهو قدام الرجال حا شاهو كلمتوا ما بتطش
من شب قام زولا قنوع ما زكا يوم درب القرش
وما شالو حق زول بالغلط وما بيرضى سمعتو تنهبش
فى ليله كان راقد حزين وسارح في الزمن الوحش
كيفن بعد كان حالو زين والسوق مفرهد ومنتعش
مرت عليهو سنين عجاف ضماير الناس تطش
بس فجاه سمع الباب يدق يالله خير واطرافو كلها ترتعش
فتح البوابه بلا نفس وقدامو كان ود الفتح
قال ليهو ادخل قالو لا انا حالى ماداير شرح
قال ليهو جيت والعشم سايقنى يا اب رايا سمح
وقفت قصاد بيتى الظروف حلفت يمين ما تزح
البيت معاهو المدرسه خلنى بى ايدي ازح
والنخله هادى قدر تشيل ياخدوهو قبال يصطبح
قال ليهو بس نقع البنوك سلفيه والحال ينصلح
قلبه وقلبتين ويا رفيق وبعدين نشيل نحن الربح
يا امه نقع الفتل ما الدنيا اصلو فرندقس
يوم انت طاير في السماء ويوم تحبو في جمر الفلس
بس قوى قلبك يا رفيق ونضمك يكون عجوه محس
من بدو كان درت النجوم تلقاها في شهقه نفس
قبال كمان تصحى الشمس مشى للخزين ود العوض
قال ليهو الا تمشى معاى اولادى ديك اكلو القرض
اتماسكوا الاتنين سوا ودحمداحمد داير يطير
مرات يجك ومرات يخب ومرات تحسبو زى عزير
بس فجاءه في لمح البصر لقى نفسو قدام المدير
نزلهم كل الشروط فيهم شرط قاسى وعسير كان الشرط ايه الضمان ما البنك منهجو برمكى

صاحبنا قام رهن الارض الشاربه من دمو الزكى مداهو معنى الانتماء والضحكه في الزمن البكى

ذرات ترابه تقولو لا والدنيا غرقت في البكى وين تانى تلقالك حضن ياويك وكتين تشتكى

مين السواي البفهك يا حمداحمد غير حكى انا يانى امك يا جناي من قمت زي
تمر الفكى
يومو اليشيل فوقك تعب لابد فوق انا تتكى
لابد نرجع لى صاد لو حتى في آخر العمر
ربيت اعمامك وابوك وما احتاجو لاعند القبر
يا ابنى لا ترهنى هوى يا ابنى عضى الصبر
ودحمداحمد بى حصار خلط البيصلح بالبضر
ماهمو ايه باكر يكون ما طالا حقتق للغرض
شال القريشات وفى جيبو شيك سمو السند
مبسوط ويضحك منتشى وصاحبك يفوجج في البلد
اولادو دايرين يابا جيب صاحبنا يدي بلا عدد
البت تجيهو المدرسه صاحبنا يدي بلا عدد
الحاجه همها توب سمح صاحبنا يدي بلا عدد
لامن شهور الجن مضن لقى نفسو مخنوق بالمسد
الشيكا باقى وقيتا جا اقصاهو لا يوم الاحد
ودحمداحمد انضرب بقى يجري زى القنقرد
مرات يفوتك في السلام مرات يسوى بكى وحرد
بس فجاه صاحبك اختفى همل عقابتو وشرد
ما راعى احساس الورا وما راعى احساس البت والولد
ولى زوجتو الممكن تضيع في زحمه الزمن النكد

• جميع كلمات اغاني جعفر السقيد
• كلمات اغاني جعفر السقيد
• جعفر السقيد
• اغاني جعفر السقيد كتابه
• كلمات جعفر السقيد
• اغاني جعفر السقيد
• جعفرالسقيد
• اغاني شايقية جعفر السقيد
• كلمات جعفر السقيد مكتوبة
• شعر جعفر السقيد مكتوب