كلمات عراقيه حزينه

((*رساله من بغداد الى كل العراقين*))

احس روحي غريبه هنا من يوم التركتوني
تانيت سنين ودهر حتى ترجعولي
ثاري العمر كله انكضه وانتم هجرتوني
لميت جروح القلب ونشفت دموعي

وبثوب الحزن غنيت يا لرحتوا سمعوني
بغداد ذكروني ابوكت وكلمه اكتبوني

((*الوطن مفقود*))

مريت وكت العصر متعني يم حمود
خدرلي جاي وبجه وسولف سوالف سود
كال انته من ياسلف كتله ابفرات الجود
دورته بالخارطه لن الوطن مفقود

ومريت للمدرسه اتامل الطلاب
شو شفت طالب بجه وحط بين اديه كتاب
بيه خارطه للوطن وعيونه كله عتاب
كتله ابني كافي البجي بالصف تره ممنوع
يابويه بعدك طفل وتبجي بكلب مفجوع
كال انه بالخارطه الكيت الوطن مبيوع

((*ممنوع الفرح*))

متواعد ويه الفرح
والوعد صارله سنين
لا مر علي بحلم
ولا شفته شوف عين
ناشدت وين الفرح؟
كالولي متاسفين
ممنوع هسه الفرح عن كل العراقيين

((*وطن بالايجار*))

حمودي ابني كبر
بصف الاول صار
شنطوه اول درس ؟
انطوه دور ودار
ردني وسالني الطفل
شتعني بابا الدار ؟
كتله الدار يعني الوطن
والدور يعني الجار
كالي غرفتنا بابا وطن ؟
كتله اي بابا
غرفتنا وطن وطن
بس وطن
بالايجار